அபுதாபியில் இன்று பலப்பரீட்சை – வெற்றியை நீட்டிப்பது டெல்லியா? மும்பையா?

13-வது ஐ.பி.எல். 20 ஓவர் கிரிக்கெட் போட்டி ஐக்கிய அரபு எமிரேட்சில் உள்ள துபாய், சார்ஜா, அபுதாபியில் நடைபெற்று வருகிறது.

இந்த போட்டியில் விளையாடும் ஒவ்வொரு அணியும் மற்ற அணிகளுடன் தலா 2 முறை மோத வேண்டும். அதன்படி ஒவ்வொரு அணிக்கும் 14 ஆட்டம் இருக்கும்.

லீக் முடிவில் புள்ளிகள் அடிப்படையில் முதல் 4 இடங்களை பிடிக்கும் அணிகள் பிளே-ஆப் சுற்றுக்கு தகுதி பெறும். 23-வது நாளான இன்று (ஞாயிற்றுக்கிழமை) 2 ஆட்டங்கள் நடக்கிறது.

துபாயில் மாலை 3.30 மணிக்கு நடைபெறும் முதல் ஆட்டத்தில் சன்ரைசர்ஸ் ஐதராபாத்-ராஜஸ்தான் ராயல்ஸ் அணிகள் மோதுகின்றன.

வார்னர் தலைமையிலான ஐதராபாத் அணி 3 வெற்றி, 3 தோல்வியுடன் 6 புள்ளிகள் பெற்று 5-வது இடத்தில் உள்ளது. அந்த அணி 4-வது வெற்றியை பெற்று முன்னேற்றம் அடையும் ஆர்வத்தில் உள்ளது.

ஸ்டீவ் சுமித் தலைமையிலான ராஜஸ்தான் அணி 2 வெற்றி, 4 தோல்வியுடன் 4 புள்ளிகள் பெற்று 7-வது இடத்தில் இருக்கிறது. முதல் 2 ஆட்டத்தில் வெற்றி பெற்ற அந்த அணி தொடர்ச்சியாக 4 போட்டிகளில் தோற்றது. தோல்விக்கு முற்றுப்புள்ளி வைத்து 3-வது வெற்றியை பெறும் வேட்கையில் உள்ளது.

இரவு 7.30 மணிக்கு அபுதாபியில் நடைபெறும் 2-வது ஆட்டத்தில் ஸ்ரேயாஸ் அய்யர் தலைமையிலான டெல்லி கேப்பிடல்ஸ் – ரோகித் சர்மா தலைமையிலான மும்பை இந்தியன்ஸ் அணிகள் மோதுகின்றன.

டெல்லி அணி 5 வெற்றி, 1 தோல்வியுடன் 10 புள்ளிகள் பெற்று முதல் இடத்திலும், மும்பை அணி 4 வெற்றி, 2 தோல்வியுடன் 8 புள்ளிகள் பெற்று 2-வது இடத்திலும் உள்ளன.

இரு அணிகளுமே கடைசியாக விளையாடிய 3 ஆட்டத்திலும் வென்று ஹாட்ரிக் சாதனை புரிந்தன. இதனால் தொடர்ச்சியாக 4-வது வெற்றியை நீட்டிப்பது டெல்லியா? மும்பையா? என்று ஆவலுடன் எதிர்பார்க்கப்படுகிறது.

டெல்லி அணி 6-வது வெற்றியை பெற்று தொடர்ந்து முதல் இடத்தில் நீடிக்க வேண்டும் என்ற ஆர்வத்தில் உள்ளது. மும்பை அணி 5-வது வெற்றியை அபாரமாக பெற்று முதல் இடத்திற்கு முன்னேறும் வேட்கையில் இருக்கிறது.

இரு அணியிலும் அதிரடியான வீரர்கள் இருக்கிறார்கள். இதனால் விறுவிறுப்புக்கு பஞ்சம் இருக்காது என்று கருதப்படுகிறது.

டெல்லி அணியில் கேப்டன் ஸ்ரேயாஷ் அய்யர், பிரித்விஷா, தவான், ரி‌ஷப்பண்ட், ஸ்டோனிஸ், ரபடா, அஸ்வின் போன்ற சிறந்த வீரர்களும், மும்பை அணியில் கேப்டன் ரோகித் சர்மா, சூர்யகுமார் யாதவ், இசான் கி‌ஷன், ஹர்த்திக் பாண்ட்யா, போல்லார்ட், குயின்டன் டிகாக், பும்ரா, போல்ட், பேட்டின்சன் போன்ற சிறந்த வீரர்களும் உள்ளனர்.