2018 தோல்வி இன்னும் நச்சரித்துக் கொண்டே இருக்கிறது: டிம் பெய்ன்

இந்திய டெஸ்ட் கிரிக்கெட் அணி 2018-19-ல் ஆஸ்திரேலியாவில் சுற்றுப் பயணம் செய்து நான்கு போட்டிகள் கொண்ட டெஸ்ட் தொடரில் விளையாடியது. இந்தத் தொடரை இந்தியா 2-1 எனக் கைப்பற்றியது. ஆஸ்திரேலிய மண்ணில் இந்தியா வென்ற முதல் டெஸ்ட் தொடர் இதுவாகும்.

ஆஸ்திரேலிய அணியின் கேப்டனாக டிம் பெய்ன் இருந்தார். இந்தியாவுக்கு எதிரான தோல்வியை டிம் பெய்னால் ஜீரணிக்க முடியவில்லை. அதற்கு பதிலடி கொடுக்கும் வகையில் அடுத்த மாதம் தொடங்கும் டெஸ்ட் தொடரை வெல்ல வேண்டும் என்ற வேட்கையில் உள்ளார்.

டெஸ்ட் தொடரை எதிர்பார்த்துக் கொண்டிருக்கும் டிம் பெய்ன், 2018 தோல்வி இன்னும் நச்சரித்துக்கொண்டு இருக்கிறது எனத் தெரிவித்துள்ளார்.

இதுகுறித்து டிம் பெய்ன் கூறுகையில் ‘‘இந்தியாவுக்கு எதிரான டெஸ்ட் தொடரை நாங்கள் இழந்ததில் இருந்து இன்னும், அந்த விசயம் நச்சரித்துக் கொண்டே இருக்கிறது. டேவிட் வார்னர் அல்லது ஸ்மித் இல்லை, எந்வொரு டெஸ்ட் போட்டியை இழக்க விரும்பவில்லை அல்லது டெஸ்ட் தொடரில் ஈடுபாடு போன்றவை இன்னும் நினைவில் ஓடிக்கொண்டே இருக்கிறது.

தற்போது உள்ளது மிகவும் சிறந்த ஆல்-ரவுண்ட் அணி. ஸ்மித் மற்றும் டேவிட் வார்னர் மட்டும் அணியில் சேரவில்லை. அதிக ரன்கள் அடிக்கும் வீரர்கள் அணியில் உள்ளனர். கடந்த 18 மாதங்களாக ஒவ்வொரு வீரர்களும் மிகப்பெரிய அளவில் முன்னேற்றம் அடைந்துள்ளனர். நாங்கள் சில சிறந்த கிரிக்கெட்டை விளையாடியுள்ளோம்’’ என்றார்.