லங்கா பிரீமியர் லீக்: இன்று இரண்டு லீக் போட்டிகள்!

இலங்கையில் விறுவிறுப்புக்கு பஞ்சமில்லாமல் நடைபெற்றுவரும், லங்கா பிரீமியர் லீக் ரி-20 தொடரில் இன்றைய தினம் இரண்டு லீக் போட்டிகள் நடைபெறவுள்ளன.

முதலில் மாலை 3.30 மணியளவில் நடைபெறும் தொடரின் ஒன்பதாவது லீக் போட்டியில், காலி கிளேடியேட்டர்ஸ் அணியும் யாழ்ப்பாண ஸ்டாலியன்ஸ் அணியும் பலப்பரீட்சை நடத்தவுள்ளன.

ஹம்பாந்தோட்டை மைதானத்தில் நடைபெறவுள்ள இப்போட்டியில், காலி அணிக்கு பானுக ராஜபக்ஷவும், யாழ்ப்பாண அணிக்கு திசர பெரேராவும் தலைமை தாங்கவுள்ளனர்.

புள்ளிப்பட்டியலை பொறுத்தவரை யாழ்ப்பாண அணி தான் விளையாடிய மூன்று போட்டிகளிலுமே வெற்றிபெற்று 6 புள்ளிகளுடன் முதலிடத்தில் உள்ளது. காலி அணி மூன்று போட்டிகளிலுமே தோல்வியடைந்துள்ளது.

இரவு 8 மணிக்கு நடைபெறவுள்ள பத்தாவது போட்டியில், தம்புள்ளை வைக்கிங்ஸ் அணியும், கண்டி டஸ்கர்ஸ் அணியும் மோதவுள்ளன.

இப்போட்டியில் தம்புள்ளை அணிக்கு தசுன் சானகவும், கண்டி அணிக்கு குசல் ஜனித் பெரேராவும் தலைமை தாங்கவுள்ளனர்.

புள்ளிப் பட்டியலை பொறுத்தவரை தம்புள்ளை அணி, தான் விளையாடிய மூன்றில் இரண்டில் வெற்றிபெற்று 4 புள்ளிகளுடன் மூன்றாவது இடத்தில் உள்ளது. கண்டி அணி நான்கில் ஒன்றில் வெற்றிபெற்று 2 புள்ளிகளுடன் நான்காவது இடத்தில் உள்ளது.