டெஸ்ட் தரவரிசையில் ரஹானேவுக்கு சரிவு

சர்வதேச கிரிக்கெட் கவுன்சில் (ஐ.சி.சி.) டெஸ்ட் கிரிக்கெட் வீரர்களின் புதிய தரவரிசை பட்டியலை நேற்று வெளியிட்டது.

இதன்படி பேட்ஸ்மேன்களின் தரவரிசையில் இந்திய கேப்டன் விராட் கோலி 928 புள்ளிகளுடன் முதலிடத்திலும்,

ஆஸ்திரேலியாவின் ஸ்டீவன் சுமித் 911 புள்ளிகளுடன் 2-வது இடத்திலும், நியூசிலாந்து கேப்டன் கேன் வில்லியம்சன் 864 புள்ளிகளுடன் 3-



வது இடத்திலும், இந்தியாவின் புஜாரா 791 புள்ளிகளுடன் 4-வது இடத்திலும், ஆஸ்திரேலியாவின் லபுஸ்சேன் 786 புள்ளிகளுடன் 5-வது இடத்திலும் நீடிக்கிறார்கள்.

இலங்கைக்கு எதிரான 2-வது டெஸ்டில் 60, 100 ரன் வீதம் எடுத்த பாகிஸ்தான் வீரர் பாபர் அசாம் 3 இடங்கள் முன்னேறி தனது வாழ்க்கையில் சிறந்த நிலையாக 6-வது இடத்தை (767 புள்ளி) பிடித்துள்ளார்.

இந்திய துணை கேப்டன் ரஹானே ஒரு இடம் குறைந்து 7-வது இடத்துக்கு (759 புள்ளி) சரிந்துள்ளார்.



பந்து வீச்சாளர்களின் தரவரிசையில் முதல் 3 இடங்களில் முறையே ஆஸ்திரேலியாவின் கம்மின்ஸ், தென்ஆப்பிரிக்காவின் ரபடா, நியூசிலாந்தின் நீல் வாக்னெர் உள்ளனர்.

இந்திய தரப்பில் அதிகபட்சமாக பும்ரா 6-வது இடத்திலும், அஸ்வின் 11-வது இடத்திலும், முகமது ஷமி 12-வது இடத்திலும் இருக்கிறார்கள்.