டிசம்பர் 19-ந்தேதியும், இந்திய டெஸ்ட் அணியும்

ஆஸ்திரேலியாவுக்கு எதிராக அடிலெய்டில் நடந்த பகல்-இரவு டெஸ்ட் போட்டியில் இந்திய அணி 36 ரன்னில் சுருண்டு படு தோல்வியை தழுவியது. இந்திய டெஸ்ட் கிரிக்கெட் வரலாற்றில் இது மிகவும் மோசமான ஸ்கோர் ஆகும்.

முதல் இன்னிங்சில் 244 ரன்கள் குவித்த இந்திய அணி 2-வது இன்னிங்சில் 36 ரன்னில் சுருண்டது. ஆட்டத்தின் 3-வது நாளான நேற்று (டிசம்பர் 19) இந்த மோசமான சாதனை நிகழ்ந்துள்ளது.

இதே நாளில் தான் இந்திய அணி மிகப்பெரிய சாதனையும் படைத்துள்ளது. 2016-ம் ஆண்டு இங்கிலாந்துக்கு எதிராக சென்னையில் நடந்த டெஸ்ட் போட்டியில் இந்திய அணி 7 விக்கெட் இழப்புக்கு 759 ரன்களை (கருண்நாயர் 303, ராகுல் 199) குவித்தது. 4-வது நாள் ஆட்டத்தில் அதாவது டிசம்பர் 19-ல் இந்த சாதனை படைக்கப்பட்டது.

இந்தியாவின் அதிகபட்ச ரன்னும், குறைந்தபட்ச ரன்னும் டிசம்பர் 19-ந்தேதி தான் நிகழ்ந்துள்ளது. அதிக பட்ச ஸ்கோரை பதிவு செய்த 4 ஆண்டுகளுக்கு பிறகு அதே டிசம்பர் 19-ந்தேதி தான் குறைந்த பட்ச ஸ்கோரும் பதிவாகி இருப்பது சுவாரசியமானது.